Sleggjubeinsdalur gönguleið

SLEGGJUBEINSDALUR; gönguleið frá Sleggjubeinsdal

Stutt leiðarlýsing: Sleggjubeinsdalur - Hengill - Vörðu Skeggi

Gönguleiðin hefst í Sleggjubeinsdal, sem er dalverpi sem gengur inn að Hengli á milli Skarðsmýrarfjalls og Húsmúla. Í Sleggjubeinsdal eru 4 hverasvæði, um er að ræða gufu og brennisteinshveri og 60 gráðu heita laug. Úr Sleggjubeinsdal er góð gönguleið um Sleggjubeinsskarð inn í Innstadal og áfram upp á Hengil, Vörðu - Skeggja. Ein þessara leiða, liggur úr Sleggjubeinsdal, vestur fyrir Húsmúla og inn í Engidal norðan hans. Önnur mjög skemmtileg leið og styttri liggur yfir Húsmúlann, undir Sleggju. Þegar upp á Húsmúlann kemur opnast sýn norður yfir Engidal og Þjófahlaup vestan undir Hengli. Engidalur er grösugur og mýrlendur. Úr norðri kemur Engidalshvísl, sem er samsafn lækja úr vesturhlíðum Hengils. Hana er oftast hægt að stikla. Við suðurenda Þjófahlaups, vestan Engidalshvíslar er nýlegt hús sem Orkuveita Reykjavíkur á. Það er opið fyrir göngufólk. Austan árinnar, langleiðina uppi við Hengil, rís upp úr grónu landinu sérkennilegur klettadrangur sem minnir á risavaxna höggmynd af skepnu einni mikilli og er vel þess virði að staldra við og skoða.

Hér kemur nánari leiðarlýsing ásamt myndum og korti:

Rauða línan sýnir gönguleiðina sem fjallað er um.

Upphaf í Sleggjubeinsdal, liggur um (yfir) Innstadal og að Vörðu-Skeggja. Smelltu á kortið til að fá stærri og skýrari mynd.

Ljósmynd tekin skammt frá Suðurlandsvegi á leiðinni í Sleggjubeinssdal. Þessi leið liggur að skíðaskálum Vals og Víkings og upphafi gönguleiðar í Sleggjubeinsdal.

Þessi mynd sýnir Húsmúla sem er lengst til vinstri. Sleggjubeinsdalur og Hengill til miðju. Skarðsmýrarfjall og Hellisskarð lengst til hægri. Húsmúli er úr grágrýti og móbergi en Skarðsmýrarfjall er úr móbergi.

ATH: Gömul mynd: með tilkomu Hellisheiðarvirkjunar hefur umhverfi breyst töluvert.

Bílastæði við upphaf gönguleiðar í Sleggjubeinsdal, þarna er upplýsingaskilti og vegvísar

( sjá mynd, Gps hnit upplýsingaskiltis: 64°02,761 N - 21°22,798 V ).

Þegar þarna er komið er hægt að velja um tvær megin gönguleiðir.

Fyrri gönguleiðin liggur um Húsmúla, frammhjá Draugatjörn, um Engidal, Marardal og að Dyradal. Við Húsmúla eru ýmsar menningarminjarnar. Ekki munum við fara nánar út í þá leið hér. Hægt er að fræðast nánar um þessa leið á síðunni um Húsmúlarétt og Draugatjörn.

Hin gönguleiðin, liggur um Sleggjubeinsdal og að Innstadal. Gangan upp á hálsinn í Sleggjubeinsdal er ekki löng en hækkunin er nokkur og dálítið brött. Upp á hálsinum er komið að vegvísi sem er 1.4 km frá upphafi gönguleiðarinnar.

Hér má sjá mynd frá gönguleiðinni, tekin skammt frá upphafi gönguleiðarinnar. Horft í átt að Sleggjubeinsdal. Skíðaskáli Víkings á hægri hönd.

Við þennan vegvísi* skiptist gönguleiðin í tvær gönguleiðir. Önnur leiðin liggur um Innstadal, Hengladal og svo jafnvel að Ölkelduhálsi en ca. 9 km leið er að Ölkelduhálsi.

Hin gönguleiðin liggur um hátt klettabelti yfir Innstadal og að Vörðu-Skeggja sem er ca. 5.2 km gönguleið. Þessi leið hefur verið skilgreind sem fremur erfið og brött. En gengið er eftir hryggnum fyrir ofan Innstadal. Erfiðleikastig: svartur litur.

*GPS hnit vegvísis: 64°03,337 N - 21° 21,880V)

Til að fræðast frekar um leiðina sem liggur frá vegvísinum um Innstadal er vert að skoða síðuna sem er sérstaklega um Hengladali og þá Innstadal.

Á leið okkar á Vörðu-Skeggja, um Víkingaleiðina, má sjá ýmislegt athyglisvert. Gróðurfar og bergtegundir á þessu svæði er fjölbreytt og fallegt. Í Sleggjubeinsdal eru 4 hverasvæði, um er að ræða gufu og brennisteinshveri og 60 gráðu heita laug.

Gengið er eftir brún fjallsins en heilmikið útsýni er yfir Miðdalsheiði á þessari leið.

Myndin hér fyrir ofan sýnir skíðaskála Víkings í Sleggjubeinsskarði sem er næst, fjær eru skíðaskálar ÍR og Valsskáli.

Brattar hlíðar og fjallgarðar. Þingvallavatn sést í fjarska. Efsti hluti Hengilssins er aðallega úr móbergi en efst er grágrýtishrúður.

Sunnan meginn við Hengilinn eru þrír dalir sem bera sameiginlega heitið Hengladalir. Það eru Innstidalur, Miðdalur og svo Fremstidalur. Talið frá vestur til suðurs.

Myndin hér fyrir ofan er tekin frá gönguleið á leiðinni á Hengilinn. Horft er í suður yfir Innstadal.

Upptök Hengladalsár er í þessum dölum. Hengladalsá rennur síðan í Ölfus í Reykjadalsá.

Myndir AÞE.